中三升中四轉校一問?

香港嘅話應該有d難度。首先據我所知，banding唔同嘅學校靠嘅程度都有d唔同，（視乎學校而言），再者淨係合格應該都唔係幾OK呀嘛，at least你都要去到考試幾高分，maybe7x-9x分先可能會consider（不過你話攞頭三應該都唔差？）？同埋中中同英中真係幾大分別，講緊你全部讀緊嘅科會用英文教（嗱，老師教書唔一定用英文教嘅，但買嘅教科書&校內考試除左中史同中國文學全部都係英文，個人覺得history嗰d都可能OK嘅，始終第二次世界大戰呢d term都可以譯得返，但感覺上數學同埋science嗰類科目應該係有d specific嘅term，呢度可能會難d），你真係要有心理準備同做過咁嘅format嘅試卷覺得OK先好去試，唔係驚你難追上咁樣嘅模式呀（題外話，唔好話中文變英文咁睇呀，本人喺英中讀書嘅，要我用中文睇番friend嘅卷都覺得難）不過，樓主真係好努力都有機會嘅，加油呀！！！

建議：

1. 問下身邊有無人讀英中，睇下佢哋d卷，熟悉下先（自己都盡量做返d難d嘅卷溫書啦）

2. 數學嗰d應該要先睇下有d咩唔同嘅term要特別記住，都係同上面一樣啦，問人借下書睇（不過本人都有d唔記得中一至中三有咩教過，有機會你睇完覺得好似無咩嘢要記term><）

3. 如果去到band 1學校，可以視乎自己興趣決定要唔要讀d必定用中文教嘅科，但老實講你揀science嗰邊嗰d科都無問題嘅，只係你都真係要努力讀書

最後，個人意見一句，唔好因為覺得band 1學校特別好、特別出名而盲目要轉去band 1學校，讀書係視乎自己嘅，學校只係一個學習嘅場所，band 1學校亦都可以有壞嘅老師、壞嘅學生，band 3學校都可以有好嘅老師、好嘅學生，只要你一心想讀書、做好自己，都可以喺讀書上出類拔萃，喺將來升學順順利利/我身邊有d人會話，其實band 2學校d老師有時候甚至比band 1學校嘅老師比心機去備課，因為佢哋知道佢地學生真係好靠佢地裡吸收知識（雖然都係會去補習啦），但band 1學校嘅老師會知道佢哋學生嘅根基好又去補習，會hea d教（雖然都係會有好老師嘅）。我就有咁樣嘅經歷，我數學根基真係唔好，又遇到個幾hea教嘅老師（例牌遲到早退病假），令我更加唔鍾意數學。或者你會話band 1讀書風氣好d，讀書程度難d，或多或少係有優勢。讀書風氣我覺得真係可以靠做好自己本分做到嘅，而且間間學校都唔同啦，讀書程度上你可以去補習（唔使好誇張咁話日日補先夠），補習社（尤其是大嗰d啦下）應該會接觸到唔同程度嘅學生，有一定幫助去參考返自己個水平去到邊。最後喺度講句我以前讀過一本書印象好深刻嘅一句，係人去創造名牌，而唔係名牌去創造人（雖然喺香港地好睇名牌嘅）。

無論點都好，希望樓主你加油努力，達到你想去做到嘅嘢啦！！！