一般球類活動 想影得清楚450D係米足夠有餘呢or 40D

在運動攝影來講,其實對焦效能的重要性遠高於連拍速度.

對焦快及準,即使連拍慢小小,仍然可以拍出清晰的照片,但就比較難補捉到最精采一刻.相反對焦效能差,即使連拍夠快,冇錯係好多靚位都影到,不過就係矇既.

無論對焦,連拍.呢兩樣都係40D大比數勝出.

40D係9點十字型對焦點,配合f2.8或更大光圈的鏡頭,中央對焦點仲會變成雙十字, 而450D只有中央是十字型,其他8點都係單線型對焦點.十字型對焦點的敏感度是單線型的3倍.

影運動唔同靜態題材,係唔可以對完焦又再構圖的,因為你構得圖來主體己經走咗.一般的做法都會用到中央以外的對焦點用連續對焦加連拍咁影.線性對焦點比起十字型對焦會猶豫好多,有時仲會對得冇咁準.

連拍方面,40D有每秒6.5張,450D則只有每秒3.5張.

呢兩樣嘢夾埋450D就會差好多.舉例影藍球想要影啱啱入樽嗰下.當你可以對到焦,用450D因為連拍慢,可能啱啱影到入樽前及後的一刻.用40D起碼多一倍機會影到啱啱入樽嗰下.仲未計最重要既對焦,對唔到直情唔駛影.

咁係咪話450D就影唔到呢?咁又未至於,不過就會冇40D咁得心應手,有好多場面會錯失咗.

如果買N記,就最好買D300,因為D200又係只得中央一點係十字型的.

最後就係鏡頭,對焦要快最好配f2.8恆定大光圈鏡頭,入光量係好影響對焦精度同速度的,所以40D一定要配有f2.8光圈鏡頭先可以啓動中央雙十字對焦點,細光圈鏡頭根本唔足以做咁精準的動作.如果你可以近距離在場邊影,咁70-200mm f2.8係通常選擇.但係如果你要影足球之類焦距就要長好多,會難影好多同埋鏡頭都會貴好多.